ROMA DRO SVETO. 1. DOM

Adadyves LILORO del e informacja lyny jekhe sajtostyr, so sykavel o centro Dom Research Center dro foro e Jerozolima. E Romani grupa khardy o Dom sy amare phrala ko Izraelo.


Ame puchjam e avtorendyr, the o raj Ariel Eliyahu (eli-ari@inter.net.il) bichad'a amenge o lyl, so jone dyne amenge e vol'a te paruvas lengire lava e Angelskone chibjatyr, te das avri pro amaro sajto e informacja amarenge Romenge te dzhinen, kaj pro sveto dzhiven vavre Roma.

"O tykno narodo Dom (o kotor bare amare Romane narodostyr) dzhivel ko Purano Foro (dre Jerozolima) the pro Belvelakiro brego pashe reka Jordano (Brzeg Zachodni Jordanu). Jone dzhiven odoj hara, desh shelbersh the butyr. Adadyves jone dzhiven, syr but bersh pale, na paruven peskire but'a, peskiro dzhiipen..."

1. E romny o Dom rakirel pale purane bersha the vash adadyves: e rany Amoun Sleem - syr dzhiven o Roma o Dom dro foro e Jerozolima

Amari historia rakirel, so Roma javne e Indijatyr hara-hara- butyr syr desh shelbersh. Amen kharen "o manusha o Dom". Amare Roma dzhiven dro Purano Foro (dava sy o kotor foroskiro ko e Jerozolima). But amare gene avri the javne te beshen dre phuv o Egipto. But gadzhe, kon lyja te sykl'akirel amaro narodo, te roden dre amari historia, pat'an, xaj ame javne e Egiptostyr. Dava nane chacho.
Syr sare narodi pro sveto, o Roma dzhiven ad'ake, syr sykaven lenge lengire tradicji, sy lende peskiro drom dro dzhiipen. Jekhe lavesa, adava sy so kerel jekhe narodoske leskro muj, so kerel e diferencja mashkir e narodi. O Roma dzhiven "adadyves the vash adadyves". Jone na kamen te paruven peskro Romano dzhiipen. Lende sy piro di te dzhiven jekh pash vavreste. Jone pat'ana, so adava dena lenge sarenge but mishtypena, paladava jone kamen te skeden khetene, te dzhiven syr jekh bari phralipen. Amare Roma dzhindle jekh pash vavreste but bersh. Adalestyr o Domengiro dzhiipen, lengire but'a na paruvenas, mek paruvenas nabut. Syr kon avela te paruvel lengiro dzhiipen, hal'uvav, na dena lenge e baxt. Pat'av, but amare lena te phenen xol'asa: "Soske te paruven amari cypa? Savo sy amaro rat, amaro di!"
O narodo Dom dzhivel dro Izraelo but bersh. Jone dzhindle odoj, koli dre phuv Izraelo javja maribnasa e Turcja. Odole bershenedyr saro sy but parudo. But parudy sy e demografia: te ginas kicy sy o manusha o Dom pro sveto, dykhas, o narodo na barjolas, ne tykh'olas. Nahara dro mariben mashkir o Izraelo the e Jordania but manusha o Dom nashle e Izraelostyr the javne kaj Jordania. Vavre churdyne khera te lathne o thana dre vavrengre phuvja piro saro Bliski Wschod: jone dzhiven akana dro Irako, Irano, Syria, Libia, Turcja the Egipto. O Roma o Dom na kamen te maren-pe. Jone daran maribnendyr. Jone na riskirna pe te rosphenen vavrenge, te keren e uchi kariera. Adalestyr lende nane e zor te khelen e rol'a dre bari polika, nane o drom te paruven e sytuacja, te keren la lachedyr vash peskiro phralipen. Jone syklyne te prastan e maribnendyr. Jone sy dur e politikatyr. Pre bibaxt, adava lacho narodo tykn'ol bersh bershestyr. Dro foro e Jerozolima the krujal, the pro Belvelakiro brego (Brzeg Zachodni Jordanu) len saren gindlo pashti 1200 manush. Adava sy zurales tyknedyr, syr sys nabut bersh pale. But manush nashnas e bidatyr, but manush mernas. Ne adale manusha kamen te dzhive the te meren pre peskri phuv dre Jerozolima. Hara jone sys syklyne te achaven o thana, te nashen e maribnendyr the vavre bute bidendyr, so lende jandle e bari politika. Akana e gody sy parudy. Jone lathne e zor te ushten opre, te na churden peskire khera. Adaja nevi pozicja barija dre nevi sytuacja. Hara jone lodle the nane lende e bari buty te churden o shteto, ne adadyves but Roma o Dom dzhiven pre phuv, dre khera. Sy lende i vavre pharipena dro dzhiipen. But manush o Dom na sy zurales barvale, nane lende o love te pleskiren o khera. Xulaja, pre lengiro phuv sy o khera, syr na kamen amare Romen, sy lende o pravo te den saren avri peskire kherestyr, mek o love palo kher sys dyne. Syr o Dom nane butdzhindle dre politika, phares lenge sy te den ranca e rada dro konflikto.
Pat'av, so mire tykne bersha sys lachedyr sarendyr dro miro dzhiipen, jone sys pherde e baxt'asa. Syr but vavre manusha o Dom kharav len mire "sovnakune bersha". Miro dad but phenelas mange, so i syr kerde o Roma o Dom dre purane bersha. Jekhe resne pro maro but'enca, peskre vastenca, biknenas khuvde divaniki (reed mats). Vavre sys dzhindle hanutar'a (tinkers, syr o Kelderar'a dre Evropa), bashavenas e muzyka, baganas the khelenas. Kon dzhinelas shukar te khuven, biknelas zhezhota, bembny the chiriklengre kherore. Kon charavel e geruvn'en, e bakren the ad'ake dur, butyr - e gren. Ame, o Dom, kamen len, syr jone sy amenca dre sari butori. Miro dad phend'a mange, xaj hara amare manusha phirenas pala grende, syr pala tykne chavorende, kerna lenge saro mishto, dena lenge saro lacho. Mre papuste sys o graj. Lesa o papu kerelas sare droma. Jov dyja te xal angledyr adale greske, the pale beshelas te xal kokoro. Myja o papu, the o graj na dzhinelas butyr, syr duj kurke, ad'ake leste dukhandyja o ilo pala papuste.
Bersha saro paruven, nashle 50 bersha parude but dr' amaro dzhiipen. E dzhuvl'a o Dom sy syklyne te keren but, dzhinen but but'a. Jone kerenas e buty pre phuv, syvenas o gada, chinenas bakrengre dzarja (poshom), kernas thava pro khuiben, the zumavenas, syr sare Romanechaja. O Roma o Dom na lodena butyr, the lengire dzhuvl'a keren but dro kher the avri. But keren e but'a dre xulangre khera, zhuzhakirna o foro, biknena dre bandzy (shops). Sare kerna e buty vavrenge, nane amarende manushende o love te hazden peskiri buty. Sare dzhiven e but'asa dyvesestyr pro dyves. O Roma o Dom na prastan pala love, nane dava lenge o angluno lav pro sveto te xas'kiras o shero pal adava. Jone na dzhinen, syr te skedes o love palo vavir dyves. Akana sy jekhe chaveste o kher, o love, dykh, sygo saro sy nashado, jov dzhivel adadyves, syr dzhivenas leskire dada. Ne e dzhuvl'a kame te paruven peskro the peskre chavorengro dzhiipen ko lacho. Jone dzhan pre buty zurales ternore, te resen pro dzhiipen, te dzhiven mishto. Paladava but chajor'ja na phiren dre shkola, adalestyr jone na dzhinen te ginen, te chinen lyla. Lenge phares te lathes lachi buty, kaj trebi sykl'akirde manushen. Lengiro dzhiipen na dzhal lokhes, the jone na dyken, syr te paruven adaja sytuacja ko lacho. O dada pat'an, xaj e nabut pod-bariny chaj sy te dzhal pre buty, e shkola na del o love.
Sy but khera, kaj e chaja dzhiven mishto. Mashkir e Romende o Dom o dzhuvl'akiro dzhiipen lyja nabut te lach'ol. Chacho te phenas, nane lende adava pravo, syr sare dzhuvl'ende pro sveto, ne but droma akana sy angil lenge. Jekhe lene te phiren kaj e shkola, te roden e buty. Jone sy syklyne te keren mishto, the sare len sharen. Vavre keren buty dre shpitali. Dre Jerozolima sy trin chaja o Dom, jone lyne te phiren pala nasvalende dre shpitali. Vavre chaja lyne te syven o gada, id'a te biknen. O nevo drom lydzhala amare chajen te keren buty avri. Adava nane shundlo hara. E tradycja sykavel, e chaj musinel te beshel khere, te kerel buty dro kher. Ne o mursha o Dom dykhen, syr saro sy parudo akana dro sveto. Pat'as, e dzhuvl'a o Dom lena te bashaven e nevi, bari rol'a dro socialno dzhiipen. Ame kamas te pat'as, so o nevo lela te bar'ol sygydyr ko lachipen the mishtypen e Romenge.

2. E romny o Dom rakirel pale purane bersha the vash adadyves: e rany Amoun Sleem - kaj beshle o Roma o Dom dro foro e Jerozolima the nadur krujal e forostyr.

Me sym pherdy e baxt'asa, syr akana me lyjom te rakirav palo Dom dre Jerozolima. Me rakird'om bute manushenca pal amari historia, te lathav katyr ame javne, te hal'uvav amaro narodo, leskro dzhiipen, syr jone dzhindle adaj but bersha. O Roma ripirnas te sanas, adava sys shukar. O Roma ripirnas te rovenas, syr jone ripirnas peskire terne bersha, peskire daden the peskire dajen. Dre durune bersha na saro sys gudlo. Ne sajekh me kamam lengire lava, syr kamam amaro baro narodo.
Jone dzhindle pre phuv, kaj trebi te maren palo dzhiipen. Adava na sys o mariben vavre manushenca. Adava sys o mariben e phuvjasa. Jone kamne adaja phuv, syr peskiro rat. Jone javne adaj te dzhiven hara-hara. Lengiri buty sys phari. Lengiro dzhiipen sys zurales kirko. Sare manusha, konestyr me phuchavas, rakirde mange, so o Roma o Dom dzhindle dre Jerozolima lub nadur e forostyr butyr, syr shel bersh. Me rakird'om e rasa Shahada, jov dzhivel akana dro foro Amman, kaj Jordania. Jov javja ko foro e Jerozolima, ame rakirasas but. Jov ripirlas e purane bersha. Jone javne ko foro pashti100 bersh pale, syr phend'a leskro dad. Pre bibaxt, jov na rakird'a peskre papusa, jov myja hara. Ne jov shund'a, lengire Roma beshle ko foro e Jerozolima butyr syr 100 bersh. Lengiro nav sy o Nawasrah. Adava nav sy but shundlo mashkir e Romende o Dom kaj e Jerozolima. Lende sys o kher dro foroskiro kotor Malhah dre nevi e Jerozolima. But Roma o Dom sys odoj dr' odo bersha. O Dom dzhindle odoj mishto-shukar, the sys lende lache kontakty sare vavre narodonca. O dzhiipen parudyja, koli e Turcja lyja maribnasa o foro e Jerozolima. Pale javja e Anglia the tradyja e Turkon, but Roma o Dom lyja e Angliakire lyla (paszport). Adadyves sy o Roma o Dom dro Ammano, the lende sy adale lyla. O raj Shahada phend'a, jov mangel e Devles te paruvel saro, te ris'on e purane bersha. Hara jone dzhindle kon dre purane barune khera, kon dre shatri. Jone kokore kerade peske o xaben, kokore kerena o gada, the ad'ake dur. Jov lyja te rakirel pale purane bersha, the mange sys shudlo, syr adava les dukhal. Jov phend'a, syr o Izraelo sys sthodo pre adale phuvja, jone sys zurales trashane. Jone lyne te skeden saro te nashen ko Ammano sare peskire mishtypnasa, sare chavorenca-chajorjenca. But Roma o Dom e kherestyr Nawasrah dr' odo dyvesa nashle ko Ammano. Vavre jachne pro purano shteto. Jone sare dzhiven dr' ada khera adadyves. But Roma phendle, xaj syr lende sy dyno e Devlestyr te meren odoj, fedyr te meren khetane. Sare o Dom duzhakirde trashane, so javela. Jone halyne, sare internacjonalna pharipena zurales marnas e Romen. Lende nane e zor dre bari politika. Paladava but Roma dzhindle dre duj phuvja, o phrala na dykhenas jekh vavres but bersh. Jone darenas te ris'on dre Jerozolima pro dyves - pro duj, syr sys trashane adatyr, so len, syr jone javne e vavre phuvjatyr e Jordania, churdena dro stariben the pheneha, xaj jone javne syr o agenti (szpiegi). But bersha o Roma darenas te javen dro peskiro rodno foro te dykhen e peskiren dre Jerozolima. Ne akana mashkir o Amman the o Izraelo sy lache kontakty, e phare bersha vash o Roma o Dom jachne pale, the amende sy e baxt te dykhen e phralen dre Jerozolima.
Me rakird'om e phura dzhuvl'asa. Joj sy e Romni o Dom. Sy zurales phuri, sy lake 90 bersha. La kharna e Asesah. Joj but phend'a pal lakiro dzhiipen, pale bidy, kicy pyne pre lengire shere. Ne joj ripirlas the i o lache dyvesa, syr jone lakire Romesa dzhindle baxtales. Lakiro Rom sys o lacho manush, ne joj les na dzhind'a the na jekhvar na dykhja angledyr e bjavestyr. Dr' odo dyvesa e dzhuvl'ake na sys te dykhes lakires Romes angledyr e bjaveskri rat'atyr. (Jekhvar miri mami phend'a mange jekh lavoro, mange nane te bistrav adava: "Mri ranori, tu san baxtali, syr san bijandly dr' ada lache bersha. Sy tumenge e vol'a te rakiren e mursheske "na", sy tuke e vol'a te duzhakires les, kon sy tuke piro di, kones tu lesa te kames. Ne dr' amare bersha amende na sys vavir drom".) Ne mek ris'uvasa ke Romny Asesah. E Asesah sy jekh adale dzhuvl'endyr, kon but dykhja dro dzhiipen, but lacho, the but kirko. Joj phend'a, syr bar'olas dro dadeskro kher, dro Purano Foro, kaj Jerozolima. Pashti 35 bersh jone dzhindle dro shteto Berge, kaj lakiro dad dyja o than dro kher e dromeskre manushenge, adava sys o Roma o Dom, the vavre, gadzhe. Joj dzhind'a odoj, pale gyja palorom dzhind'a dro peskire romeskro kher. La dyne palorom but ternori. Syr javja o mariben mashkir o Ammano the o Izraelo, late sys shtar tyknore.
O mariben jand'a but bibaxt e manushenge. Jone lyne te roden, kaj the syr te garaven pes the peskeren chavoren, te jachen dzhide. Dr' odo phare dyvesa pashti jepash lengire rodostyr nashle kaj e Jordania. "Jone nashle, gyne but bersha, the amenge phendle, so jone jachne dzhide". O Roma jachne dro foro dzhindle but kirke dyvesa. Hal'ov, adalestyr jone na lyne butyr te prastan, jone jachne odoj zhiko meriben, syr o Devel kamela len te lel ke pe. But Roma o Dom pat'an, so e sv'ento phuv o Izraelo sy jekhori lengiri phuv. Dur e forostyr, dre phare bersha jone ripirnas ada phuv, kamenas te ris'on pale dro foro, kaj lengire tykne dyvesa urn'andyne avri.
O mariben javja pale (mashkir e Arabi the o Izraelo, 1967 b., odo xol'amo mariben gyja sygo, shov dyves, the paladava sys khardo "o shov-dyvesengro mariben"). The javja e nevi bibaxt amare manushenge. Nadur amare kherendyr sy e khangeri, e sv'ento Ana. Adaja sy pashe foroskire udera, jone sy khardle e Levoskire, dro Purano Foro. Syr o mariben javja, amare Roma the but vavre Roma lyne te prastan ke khangeri te garaven-pe odoj, jone jachenas odoj sare shov dyvesa. Amare Roma ripirnas odole dyvesa syr o kirke dyvesa pherde e daratyr. But Roma sys nashade, the chavore, the phure, the i dzhuvl'a. O Roma kharen adale dyvesa "shov dyvesa dro p'eklo". Lengire lavendyr me halyjom, k'a bari sys lengri bida, k'a kirki dukh zaxane lengre ile. Odo sys miro shukar narodo!
Miri mami sys e dzhuvla bare ilesa. Jekhvar sys lake trebi te dzhal avri, joj prastandyja e khanger'atyr sv'ento Ana khere te lel o xabe, nadut jarzho te keraves o maro e Romenge, kon sys garade odoj. Joj sys nadur e khanger'atyr, syr shund'a, o bolyben pharad'a-pe. E raketa (missile) mard'a e khangeri, ne rakhel len o Devel, nikon na sys za-mardo. Miri mami pyja te rovel, syr joj na dzhind'a, so sare sys saste-dzhide. Miro kakoro dykhja la the phend'a: "Nichi, na dar, ame sare sam dzhide. Jav ko amen". Sare shov dyvesa joj phirelas ko kher the pale. Dykhelas pro kher, nikon o kher na chilad'a, na chord'a nichi, ne but vavre khera sys kerde nange dr' odo dyvesa. But Roma, chorrore manusha beshenas bokhale. Na sys lende o xaben, na sys o love te kinas o maro. Raty sys shundlo o mariben. O manusha darenas te dzhan avri. E khangeri sys lenge o kher, the e Devleskre phen'a dena lenge te xan. Ripirav, dava sys e shuki thud vash tykne chavore. Adava sys e bari baxt, mira date sys shov tykne chavore. Odole phen'a kerenas amare manushenge saro mishto, kicy lende sys e zor. Amare Romenge sys nabut lokhedyr, syr lenca sys miri mami, joj sarenge kerelas mishto dr' odo bida. Odole shov dyvesa sykadyne bare syr shov bersh. Adava sys kirke dyvesa dr' amari historia.
Sare shunenas, kicy nabut e Romenge trebi - te xan mishto, te aven uride mishto, te beshen pro mishto shteto. But bersh pale o Dom dzhindle pro zurales mishto shteto. Jone dzhindle kaj Wadi Goss dre Jerozolima. Odo phuv sy e xulaskri. Jekh Arabo sys o xulaj. Jov lyja te skedel dro drom the sys trebi leske te biknav odo kotor phuv. Jov phend'a mre papuske te kinel e phuv, ne mre papuste sys but chavoren, the jov pat'andyja, e love, kicy leste sys, fedyr te del pro chavorende, the pro piben e phralenca. Ad'ake na sys leste o love te kinel odo phuv. Sy mange kirko te ripirav odo. Kon dzhinel, syr jov kind'a by odo phuv, amaro dzhiipen mozhe gyja by vavre dromesa. Odo phuv sy odoj, kaj sy akana bari timin pre phuv nadur e forostyr e Jerozolima. Tu shund'an, amare Roma dzhindle hara pre ada phuv, pro lacho shteto. Amarende dadende sy o lyla, kaj sy chindlo the sykado adava saro. Ame dzhind'am beshle odoj e bershestyr 1920 the haratyr. Amare Bare Shereste sy i vavre lyla, kaj sy sykado, kaj amare beshenas odoj but bersh pale. The garavel the te lydzhal o lyla - adava sy leskiro buty. Jov sy o Baro Shero dr' amaro phralipen o Dom. Jov chind'a pro lyl, kon lyja e dzhuvl'a, kon sy bijandlo. Leste sy but lyla. But Roma phendle mange, ame sam jekh phuro narodo, jekh mashkir phuredyr, kicy akana dzhiven dre Jerozolima.